Özümə nəsihət
Dağ dağa söykənər, bulud buluda,
Buludun öz yeri, dağın öz yeri.
Dözmək çətin olmaz hicrana, oda,
Olmasa ürəkdə acı söz yeri.
Hər yaşın barını məhəbbətlə dər,
Ömür əmanətdir, sovurur illər.
Baxımsız deyildir işlər, əməllər,
Vardır hər baxışda neçə göz yeri.
Düşsən kin oduna közər, alışma!
Qaynar qazan kimi köpürmə, daşma,
Hirsin cin atında hüdudu aşma,
Saxla barışmağa barı üz yeri.
Yalan qızıl tacda sevilə bilməz,
Haqqa yüz qılınc vur, yıxılar, ölməz.
Namərd bazarına alıcı gəlməz,
Düz danış, düz otur, düz gül, düz yeri.
Pak eşqin odunda alışdıqca yan,
Ver öz məsləkinə başını qurban.
Qalsın əməlindən, arzularından
İşindən həyatda barı iz yeri.
Ağır daş yüküdür soyuq ədalar,
Hörmətin cavabı ehtiram olar.
Hüquq bir olsa da, böyük, kiçik var,
Allah göstərməsin böyüksüz yeri.
